दलहरुले समानुपातिक उम्मेदवारको बन्दसूची आज निर्वाचन आयोगमा बुझाउदै ।

काठमाडौं, २९ असोज ।
आगामी मंसिरमा हुने प्रदेशसभा र प्रतिनिधिसभाको निर्वाचनका लागि दलहरुले समानुपातिक उम्मेदवारको बन्दसूची आज निर्वाचन आयोगमा बुझाउँने भएका छ्न ।

आयोगले बन्दसूची बुझाउन बिहान १० देखि अपराह्न ५ बजेसम्मको समय तोकेको छ । समानुपातिकतर्फ प्रतिनिधिसभामा १ सय १० र ७ वटा प्रदेशका लागि २ सय २० जना सदस्य चुनिने छन् । समानुपातिक निर्वाचन प्रणालीमा चुनावमा भाग लिन ८८ वटा दल निर्वाचन आयोगमा दर्ता भएका छन् ।

आयोगमा दर्ता भएका दलहरुले मात्र बन्दसूची बुझाउन पाउने छन् । राजनीतिक दलले प्रतिनिधिसभा र प्रदेशसभा सदस्यका लागि अलग अलग बन्दसूची आयोग केन्द्रीय कार्यालयमा बुझाउनुपर्ने छ । प्रदेशसभाका हकमा प्रदेशपिच्छे अलगअलग सूची हुनुपर्ने छ । प्रतिनिधिसभा र ७ वटै प्रदेशसभाका लागि समानुपातिकतर्फको बन्दसूची बुझ्न छुट्टै डेस्क स्थापना गरिएको निर्वाचन आयोगले जनाएको छ ।

समानुपातिकतर्फको बन्दसूचीमा परेका व्यक्ति प्रत्यक्षतर्फ उम्मेदवार हुन पाउने छैनन् । बन्दसूची पेश गर्ने दलले समानुपातिकतर्फको कूल सदस्य संख्याको कम्तिमा १० प्रतिशत सदस्यका लागि उम्मेदवारी दिनुपर्ने हुन्छ ।

बन्दसूची तयार गर्दा दलहरुले कूल उम्मेदवारको कम्तिमा ५० प्रतिशत महिलाको नाम समावेश गर्नुपर्ने कानुनी प्रावधान रहेको छ ।

 

प्रतिक्रया दिनुहोस्