विश्वकप फुटबल खेल्ने इटालीको सपना चकनाचुर ।

काठमाडौ, २८ कात्तिक ।
चारपटकको विश्व विजेता इटालीको विश्वकप फुटबल खेल्ने सपना चकनाचुर भएको छ ।गएराति भएको विश्वकप छनौटका लागि युरोपियन क्षेत्रको प्ले–अफ अन्तर्गत दोस्रो लेगमा स्वीडेनसँग गोलरहित बराबरीमा रोकिएपछि इटालीको विश्वकप खेल्ने संभावना सकिएको हो । स्वीडेनसँगको पहिलो लेगमा १–० ले पराजित भएको इटाली दोश्रो लेगमा बराबरीमा रोकिएको हो । इटाली सन् १९५८ पछि (६० वर्षमा) पहिलोपल्ट विश्वकपमा छनौट हुन असफल भएको हो ।

सन् १९३० को पहिलो विश्वकप खेल्न अस्वीकार गरेको इटाली १९५८ बाहेकका सबै संस्करणमा छनौट हुँदै आएको थियो । सन् १९३४, १९३८, १९८२ र २००६ को विश्वकप विजेता इटाली १९७० र १९९४ मा उपविजेता बनेको थियो । समग्रमा इटालीलाई १–० ले हराउँदै स्वीडेन १२ औं पल्ट विश्वकपमा छानिएको हो । सन् १९५८ को उपविजेता स्वीडेनले पछिल्लो पल्ट सन् २००६ को विश्वकप खेलेको थियो ।

१२ वर्षपछि विश्वकपमा पुनरागमन गर्ने क्रममा जियानलुइजी बुफोनको क्लब इटालीलाई स्वीडेनले निराश पार्‍यो । खेल अवधिभर अधिकांश समय बलमा नियन्त्रण रहेर पनि इटालीले बललाई विपक्षीको पोस्टमा प्रहार गर्न भने सकेन । इटालीलाई गोल गर्न नदिनु नै स्वीडेनका लागि विश्वकप यात्रा तय गर्ने बाटो बन्यो ।

इटालीले २० पटकसम्म पोस्ट प्रहार गरे पनि त्यो गोलमा परिणत भने हुन सकेन । विश्वफुटबलमा आफ्नो उत्कृष्ट खेल कौशल तथा भव्य व्यक्तित्वको परिचय बनाएका इटालीका कप्तान तथा गोलरक्षक बुफोनका लागि अन्तिम खेल निकै निराशाजनक बन्यो ।

(उज्यालो बाट)

प्रतिक्रया दिनुहोस्