कर्मचारी समायोजन टुंगियो, प्रदेश र स्थानीय तहमा कर्मचारी अभाव कायमै

काठमाडौं । प्रदेशस्तरीय लोकसेवा आयोग गठन गरी नयाँ कर्मचारी भर्ना नलिएसम्म प्रदेशमा कर्मचारीको अभाव हुने अवस्था देखिएको छ।  प्रदेश र स्थानीय तहको तुलनामा अत्यधिक कर्मचारी संघमै समायोजन भएको छ।

करिब ७७ हजार कर्मचारीमध्ये २२ हजार नौ सय १७ कर्मचारी समायोजन भइसकेको छ। हालसम्म संघमा १७ हजार दुई सय ७९, प्रदेशमा दुई हजार चार सय ४८ र स्थानीय तहमा तीन हजार एक सय ९० कर्मचारी समायोजन भएका छन्। करिब ७७ हजारमध्ये २७ हजार चार सय ६१ जनाले स्थानीय तह र १४ हजार दुई सय ६९ जना प्रदेश रोजेका थिए। प्रदेशमा २२ हजार सात सय ५५ र स्थानीय तहमा ६७ हजार पाँच सय तीन वटा दरबन्दी छ।

स्थानीय तहमा एक हजार निजामतीसहित अहिले करिब १८ हजार कर्मचारी कार्यरत छन्। त्यसैले सबै कर्मचारीको समायोजन टुंगिए पनि प्रदेश र स्थानीय तहमा कर्मचारी अभाव हुने अवस्था देखिएको हो। ‘प्रदेश र स्थानीय तहमा प्रशासनिक काम अघि बढाउन थप कर्मचारी भर्ना नगरी हुँदैन।

केन्द्रले अहिले कर्मचारी खटाए पनि यो जनशक्तिले प्रदेश र स्थानीय तहको कार्यभार सम्हाल्न सक्दैन’,मन्त्रालयका प्रवक्ता एवं सहसचिव सुरेश अधिकारीले भने। -नेपाल समाचारपत्र 

प्रतिक्रया दिनुहोस्