1 April 2020  |   बुधबार, चैत्र १९, २०७६

अब धरान, पोखरा र नेपालगन्जमा पनि कोरोना परीक्षण गरिने

    | प्रकाशित मितिः बुधबार, चैत्र १२, २०७६  

काठमाडौ ।सरकारले उपत्यकाबाहिर पनि कोरोना भाइरस परीक्षण गर्ने भएको छ । उपप्रधानमन्त्री ईश्वर पोखरेल नेतृत्वको उच्चस्तरीय समितिको मंगलबार बसेको बैठकले बिपी कोइराला स्वास्थ्य विज्ञान प्रतिष्ठान धरान, पोखरा स्वास्थ्य विकास प्रतिष्ठान पोखरा र भेरी अस्पताल नेपालगन्जमा यथाशीघ्र परीक्षण सुरु गर्न स्वास्थ्य मन्त्रालयलाई निर्देशन दिएको छ ।

स्वास्थ्य मन्त्रालयका अनुसार प्रदेशमा रहेका विश्व स्वास्थ्य संगठनका प्रतिनिधिले नमुना संकलन गर्नेछन् र परीक्षण स्थलसम्म पुर्‍याउने काम सामाजिक विकास मन्त्रालयले गर्नेछ । ती अस्पतालमा परीक्षण सुरु नहुँदासम्म नमुना संकलन गरेर हवाईमार्गबाट काठमाडौं ल्याइनेछ । यसको व्यवस्थापन मिलाउन पर्यटन मन्त्रालयलाई जिम्मा दिइएको छ ।

त्रिभुवन विश्वविद्यालयले पनि कोरोना भाइरस परीक्षणका लागि सरकारलाई तीनवटा ल्याब दिने भएको छ । अहिले कोरोनाको परीक्षण भइरहेको राष्ट्रिय जनस्वास्थ्य प्रयोगशालाजत्तिकै सुविधासम्पन्न ल्याब टियूसँग छन् । विद्यार्थीको प्रयोगात्मक अभ्यासका लागि ती ल्याब प्रयोग भइरहेका छन् ।

त्रिविका उपकुलपति प्रा.डा. धर्मकान्त बाँस्कोटाले व्यक्तिगत सुरक्षा इक्विपमेन्ट (पिपिई) र किट भए त्रिविमा रहेका तीनवटै ल्याबले कोरोना परीक्षण गर्न सक्ने बताए । ‘त्रिविका विद्यार्थीलाई तालिम दिन ल्याइएका तीनमध्ये दुईवटा ल्याबमा कोरोना भाइरस परीक्षण गर्न बायोसेफ्टीसमेत छ,’ उपकुलपति बाँस्कोटाले भने, ‘सरकारले आवश्यक ठानेमा त्रिविका ल्याब एकैठाउँमा राखेर वा काठमाडौंका फरकफरक ठाउँमा लगेर पनि परीक्षण गर्न सकिन्छ ।’ यसका लागि आवश्यक जनशक्तिसमेत त्रिविसँग रहेको उनले बताए ।

त्रिविका सूक्ष्म जीवविज्ञान केन्द्रीय विभाग, जैविक प्रविधि केन्द्रीय विभाग, ट्रफल आयोजना (बायोमेटोरियल प्रयोगशाला)मा कोरोना भाइरस परीक्षण गर्न सकिने उपकरण (रियल टाइम पिसिआर मेसिन) छन् ।

नयाँ पत्रिका दैनिक

प्रकाशित मितिः बुधबार, चैत्र १२, २०७६     6:35:10 AM  |

प्रतिक्रया दिनुहोस्