म्याच फिक्सिङ मुद्दामा ६ जनाले पाए सर्वोच्चबाट सफाइ

काठमाडौं। म्याच फिक्सिङ (खेल मिलेमतो) को आरोपमा राज्यविरुद्धको अपराधको मुद्दा लागेका राष्ट्रिय टिमका तत्कालिन कप्तान सागर थापासहित ६ जनाले सर्वोच्च अदालतबाट सफाइ पाएका छन् ।

सर्वोच्चले मंगलबार म्याच फिक्सिङको आरोपमा मुद्धा खेपिरहेका थापा सहित ६ जना फुटबरलाई सफाई दिएको हो । विभिन्न अन्तर्राष्ट्रिय खेलमा मिलेमतो गरेको आरोपमा नेपाल पुलिसले थापासहित अन्जन केसी, रितेश थापा, विकाससिंह क्षेत्री र सन्दीप राईलाई पक्राउ गरी विशेष अदालतमा राज्यविरुद्धको अभियोगमा मुद्दा लगाएको थियो।

आज सर्वोच्चका न्यायाधीशहरू डाक्टर आनन्दमोहन भट्टराई र बमकुमार श्रेष्ठको संयुक्त इजलासले विशेष अदालतले गरेको फैसलालाई आज सदर गरेको हो । फैसलाको विस्तृत पूर्ण पाठ भने केही हप्तापछि मात्र आउनेछ ।

खेलाडीहरूलाई राज्यविरुद्धको अपराधमा मुद्दा दर्ता गरे पनि राज्यविरुद्धको अपराध हुनका लागि कानूनमा स्पष्ट व्यवस्था नभएको, फौजदारी कानूनमा अभियोग कानूनद्वारा पुष्टि नभएको तथा एकातिर राज्यविरुद्धको अपराधको कानून नभएको अर्कोतिर अभियोग लगाएजस्तो राज्यविरुद्धको अपराधलाई पुष्टि हुन सक्ने आधार र कारणसमेत नभएको भन्दै विशेष अदालतले खेलाडीहरूलाई सफाइ दिएको थियो। त्यसपछि सरकारले सर्वोच्चमा मुद्दा चलाएको थियो।

कसूरको प्रकृति खेल मिलेमतो (म्याच फिक्सिङ) रहेको र फौजदारी संहितामा म्याच फिक्सिङको कानून पछि मात्रै आएको थियो। तर, यो कसूर अगाडिको नै भएकाले कानूनको अभावमा सफाइ दिएको विशेष अदालतको फैसला सदर भएको हो।

प्रतिक्रया दिनुहोस्