विश्वमा कोरोनाले निम्त्याएको बित्यास ; कहाँ कतिको भयो मृत्यु ?

काठमाडौ । विश्वभर कोरोना भाइरसबाट संक्रमित हुनेको संख्या १ करोड ५ लाख ७४ हजार ३ सय ९८ पुगेको छ। पछिल्लो २४ घण्टामा मात्रै विश्वभर १ लाख ७० हजार ९ सय ६ जना नयाँ संक्रमित थपिँदा ५ हजार २९ जनाको मृत्यु भएको छ।

यससँगै कोरोना संक्रमणका कारण हालसम्म विश्वभर मृत्यु हुनेको संख्या ५ लाख १३ हजार १ सय १४ पुगेको छ। कोरोनाबाट ब्राजिलमा एकैदिन १२ सय ७१ जना कोरोना संक्रमितको मृत्यु भएको छ भने झण्डै ३८ हजार नयाँ संक्रमित थपिएका छन्। त्यहाँ हालसम्म कोरोना संक्रमणबाट मृत्यु हुनेको संख्या ५९ हजार ६ सय ६५ जनाको मृत्यु भइसकेको छ।

विश्वमा कोरोनाबाट सबैभन्दा प्रभावित बनेको अमेरिकामा एकैदिन ४२ हजार २ सय ५० जना नयाँ संक्रमित थपिँदा ७ सय ४८ जनाको मृत्यु भएको छ। यससँगै त्यहाँ हालसम्म २७ लाख २७ हजार बढी संक्रमित फेला पर्दा हालसम्म मृत्यु हुनेको संख्या १ लाख ३० हजार १ सय ६ पुगेको छ।

यता छिमेकी देश भारतमा ५ सय ६ जनाको मृत्यु भएको छ भने १८ हजार २ सय ५६ जना नयाँ संक्रमित भेटिएका छन्। भारतमा कोरोना संक्रमणबाट हालसम्म १७ हजार ४ सय १० जनाको मृत्यु भइसकेको छ भने संक्रमित हुनेको संख्या ५ लाख ८५ हजार ७ सय ९२ पुगेको छ।

उता मेक्सिकोमा थप ४ सय ७३, पेरुमा १ सय ७३, रुसमा १ सय ५४, इरानमा १ सय ४७, पाकिस्तानमा १ सय ३७ तथा साउथ अफ्रिकामा १ सय २८ कोरोना संक्रमितको मृत्यु भएको छ।

 

 

प्रतिक्रया दिनुहोस्