महिला लिग फुटबलः सावित्राको डबल ह्याट्रिकमा एपीएफको फराकिलो जित

काठमाडौं। विभागीय टोली एपीएफले राष्ट्रिय महिला लिग फुटबलमा लगातार आठौं जित हात पारेको छ।

बुधबार भएको खेलमा साविक विजेता एपीएफले रौतहटको चन्द्रपुर नगरपालिकालाई ८-० ले पराजित गरेको हो। एपीएफको फराकिलो जितमा सावित्रा भण्डारीले डबल ह्याट्रिक गरिन्। यस्तै अनिता बस्नेतले दुई गोल गरिन्।

सातदोबाटोस्थित एन्फा कम्प्लेक्समा भएको खेलमा सावित्राले खेलको छैठौं, ३३औं, ४७औं, ६०औं, ६२औं र ७९औं मिनेटमा गोल गरिन्। जारी लिगमा सावित्राको गोल संख्या ३८ पुगेको छ।

अनिता बस्नेतले खेलको पहिलो र ५४ औं मिनेटमा गोल गरिन्। चन्द्रपुर विरुद्धको पहिलो खेल एपीएफले ६-० ले जितेको थियो।

लिगमा शतप्रतिशत जित हात पारेको एपीएफले ८ खेलबाट २४ अंक जोड्दै दोस्रो स्थानको त्रिभुवन आर्मी फुटबल क्लबमाथि ५ अंकको अग्रता बनाएको छ। आर्मी समान खेलबाट १९ अंकसहित दोस्रोमा छ।

प्रतिक्रया दिनुहोस्