विप्लव र सरकारबीच तीन बुदे सहमति, ओली र विप्लवले भोलि एकैमञ्चबाट सम्बोधन गर्ने

काठमाडौं । सरकार र विप्लव नेतृत्वको नेकपाबीच ३ बुँदे सहमति भएको छ। सहमतिसँगै विप्लव नेतृत्वको नेकपामाथिको प्रतिबन्ध फुकुवा भएको छ। र, संवादबाट बाँकी विषय हल गर्ने सहमति भएको सरकारी वार्ता टोलीका सदस्य डा.राजन भट्टराईले जानकारी दिए।

प्रधानमन्त्री केपी शर्मा ओली र विद्रोही दल नेकपाका महासचिव नेत्रविक्रम चन्द ‘विप्लव’ले भोलि एउटै मञ्चबाट सम्बोधन गर्ने भएका छन्।

आज सरकार र विद्रोही पक्षबीच तीन बुँदे सहमति भएपछि भोलि ओली र विप्लव सँगै देखिने भएका हुन।

प्रधानमन्त्री निवास बालुवाटारमा बिहीबार बिहान भएको वार्तामा तीन बुँदे सहमति भएको हो। सरकारले विप्लव समूहमाथि यसअघि लगाएको प्रतिबन्ध फुकुवा गरेको छ।

सहमतिअनुसार विप्लव समूहका नेता(कार्यकर्ताहरू माथि लगाएका मुद्दा फिर्ता गर्ने भएको छ भने विप्लव समूहले आफ्नै सबै राजनीतिक क्रियाकलाप शान्तिपूर्ण रूपमा गर्न सहमति भएको छ।

सहमतिको विस्तृत विवरण शुक्रबार सार्वजनिक गर्ने सरकारी वार्ता टोलीका संयोजक गृहमन्त्री रामबहादुर थापा ‘बादल’ र विप्लव समूहका वार्ता टोली प्रमुख खड्गबहादुर विश्वकर्मा ‘प्रकाण्ड’ले हस्ताक्षर गरेको प्रेस नोटमा उल्लेख छ।

शुक्रबार २ बजे एउटा कार्यक्रम आयोजना गरी प्रधानमन्त्री केपी शर्मा ओली विप्लव समूहका महासचिव विप्लवले सहमतिको विस्तृत विवरणसहित सम्बोधन गर्ने कार्यक्रम रहेको प्रेस नोटमा उल्लेख गरिएको छ।

 

प्रतिक्रया दिनुहोस्