छोड्नेवाला छैन, फेरि क्रान्ति गर्छुः प्रचण्ड

‘साथीहरु छुट्दा कमजोर भएजस्तो देखियो, अब सबै क्रान्तिकारीहरुलाई एकजुट गराउँछु’

काठमाडौं। नेकपा माओवादी केन्द्रका अध्यक्ष पुष्पकमल दाहाल प्रचण्डले प्रतिक्रियावादी र अवसरवादविरुद्ध फेरि एकपटक क्रान्ति गर्ने बताएका छन्।

पेरिसडाँडामा आयोजित नयाँ नमुना स्वास्थ्यकर्मी संघको कार्यक्रमलाई विहीबार सम्बोधन गर्दै उनले एउटा ‘व्याटल’ जितेको भएपनि अझै वार नजितेको बताए।

‘एकचोटी फेरि कोर्स करेक्सन गरेर प्रतिक्रियावादी र अवसरवादविरुद्ध लड्नुपर्छ। जनयुद्ध सुरु गर्ने बेला म ४२/४३ वर्षको थिएँ, अहिले ६६/६७ भएँ, उमेरले कति दिन्छ भनेर पनि कतिपयले भन्छन्, उमेर भएकाले त छाडिदिनुपर्छ पनि भन्छन्,’ प्रचण्डले भने, ‘म छोड्नेवाला छैन। माओत्सेतुङले ७२ वर्षमा सांस्कृतिक क्रान्ति गरेका थिए, म एकचोटी फेरि क्रान्तिमा जानेवाला छु।’

संसद विघटन, संघीय लोकतान्त्रिक गणतन्त्र खारेज गर्ने विरुद्धको देशव्यापी व्याटल जिते पनि वार जित्न बाँकी रहेको उनको भनाइ छ।

उनले अझै त्यसविरुद्ध ठूला ठूला षड्यन्त्र भइरहेको बताए। ‘हामीले त्यो षड्यन्त्रविरुद्ध अब आफ्नो खट्टामा उभिएर लड्नुपर्छ। आफ्नै साथीहरु छुट्दा हामी अलिक कमजोर भएजस्तो देखिएको हो’ उनले भने, ‘अब आफ्नो क्रान्तिकारी साथीहरुलाई जोडेर एक हुने अभियानमा लागेको छु।’

उनले अब दुई चार बर्ष जनताको बीचमा जाने लक्ष्य लिएको बताए। ‘फेरि जनतासँग जोडिने, फेरि देशव्यापी अभियान चलाउनेतिर सोचिराखेको छु। काठमाडौंभन्दा अभियानमा बढी बस्ने बिचार छ’। उनले भने, ‘फेरी दुई/चार वर्ष जनताका बीचमा गएर क्रान्तिलाई सफल पार्नुछ।’

अहिलेसम्मको उपलब्धि जोगाउनका लागि एकजुट भएर लागेर त्यसको रक्षा गर्न सक्ने दाबी उनले गरे। उनले शान्तिपूर्ण ढंगले जनताको बीचमा गएपछि प्रतिक्रियावादीहरु परास्त हुने बताए।

‘पुराना साथीहरु छुटेका छन्, त्यो कुरा सत्य हो, अब मैले त्यो उल्टाएर सबैलाई एकजुट गर्नमा लाग्छु’ उनले भने, ‘मैले उमेर पुग्यो भनेर कतिले अहिल्यै छाडे हुन्छ भनेका छन्। तर, अब पनि छोड्नेवाला छैन। अहिलेको एउटा व्याटल त जितेँ अब दुई चारवटा व्याटल हामीले जित्नुपर्छ।’

उनले आफ्ना पुराना साथीहरुको भर गरेर नै नयाँ जनयुद्ध सुरु गरेको बताए।

‘जनयुद्धका जनमुक्ति सेनाहरु खाडी मुलुकमा रहेका छन्। केही दिनअघि मैले उहाँहरूसँग जुम मिटिङ गरेको थिएँ’ उनले भने, ‘उहाँहरुले फेरि लड्न पर्यो भने आउँछु भन्नुभयो। मलाई उहाँहरुको कुराले भावुक बनायो। उहाँहरु आफैँ बेरोजगार भएर विदेशी भूमिमा हुनुहुन्छ।’

उनले जनयुद्ध भनेर हिंसामा जाने कुरा नगरेको दाबी गरे। ‘अहिले हिंसाको कुरा गरेको होइन। जनयुद्धमा पनि राजनीतिक गरेका हौँ। सामान्तवादविरुद्ध अहिले पनि प्रतिगमन र दक्षिणपन्थी विरुद्ध हामीले युद्ध गरेका हौँ। त्यो अहिले चलिरहेको छ’ उनले भने।

केपी ओलीको प्रवृत्ति विरुद्ध १९ पेजको डकुमेन्ट लेख्दै गर्दा अर्को जनयुद्धको थालनीको डकुमेन्ट लेखेको अनुभव भएको पनि उनले सुनाए। ‘केपी प्रवृत्ति विरुद्ध लागिरहेको छु। त्यस बिषयमा जेल जान या मर्न तयार भएर त्यो पत्र लेखेको हुँ’ उनले भने।

माओवादी केन्द्रको केन्द्रीय कमिटीको बैठक र राष्टिय कार्यकर्ता भेला गर्न लागेको उनले बताए।

प्रतिक्रया दिनुहोस्